首頁 » 技術 » A.I.鐵達尼

A.I.鐵達尼

 

source: oscars.org

人類使用A.I.必須經過一個鐵達尼級災難先可能發生革新,但要睇人類過唔過到呢關。

眾所周知,人類嘅無知同狂妄自大嘅程度,連人類自己都驚。人類過往响航海同航空分別都遭遇過毀滅性嘅災難,例如鐵達尼號郵輪同興登堡號飛船,都係車毀人亡嘅悲劇。人類往往要有過慘痛嘅經驗先知謙卑,相信响A.I.嘅發展路上都唔會有例外。鐵達尼級災難响發生之前係冇預期過嘅,正所謂零缺點,無敵嘅嘢又點會係有缺陷嘅呢?未出事咪無敵囉,要出咗事之後先知原來會出事架嘛。

隨便諗吓都驚,而家A.I.收集大家嘅行為記錄,可以按每個人嘅喜好供應資訊,每個人可以獲得嘅資訊都係度身訂造,最符合需要,A.I.就係最了解自己,佢俾咩出嚟都係為咗你好,佢會話埋俾你聽咩嘢啱你食,甚至將來佢係準備埋個餐俾你,係得呢個餐,唔食就無架喇。當然應該唔會咁誇張,但係佢真係控制咗你接收資訊嘅渠道,就算唔係得一個餐過你食,俾ABC餐你又點,佢都冇俾DEF餐你揀,甚至從來冇俾你知有啲咁嘅嘢。

神醫華陀都有死嘅一日,但係華佗A.I.就無,仲會越來越勁,佢嘅判斷唔會有錯,唔怕有誤診,全世界只需要一個醫生,佢識救你就有得救,佢宣佈你冇得救你就死梗,世界唔需要第二個醫生,一個權威就夠。華佗A.I.係唔會醫死人嘅,只係個病人冇得醫。

當路面車輛都由A.I.全權控制,行人就如次等階級,比現時更危險,現時都話渣車嘅人有好有衰,但係A.I.最終只有一種,就係最好果種,行人同乘客嘅生命都掌握喺A.I.嘅手中。

世界上最堅固嘅嘢同時其實又係最脆弱,將所有系統連埋一齊做一個系統,好果陣咪好囉,一出事就一鑊熟。A.I.嘅出現,或者講A.I.主導嘅社會出現,必然將原本分散多元嘅世界集中一元。原本有好多個方法做到嘅嘢,其中一啲方法因為環境改變而失利,其他方法仍然可以發揮效用,咁個社會就可以好快復完,其他方法可以擴大去填補返缺失,又因為多元性,創新方法比較容易有空間去養成。

天馬行空嘅嘢唔會有講完嘅一日,以上嘅嘢都係唔會發生住,如果人類根本無法革新去到果個階段。要關心上面果啲新時代嘅嘢會點出事之前,應該先關心點樣過渡到呢個新時代。

有學者相信A.I.出現會產生一個新社會階級——無用階級,無用階級主要係舊時代人,新時代人都係適應新時代,能夠被A.I.主導嘅社會所需要,雖然呢啲需求係咩而家都仲係言之尚早。
但係舊時代人响新制未成氣候之前仍把持大政治力量,理論上佢哋係既得利益者,手中掌握住絕大部份嘅舊世界產業,呢啲產業仍然係主要嘅實體經濟,當然,到新產業成熟,舊產業就會瞬間消失,立竿見影。但一日未到被取代嘅時候,一日都仲係主宰住世界嘅經濟命脈。

呢股新時代最大阻力,唔係咁易可以俾新時代人搞得掂,但係佢哋嘅整體利益會逐步俾裏面一部份嘅人出賣。情況會係點?佢哋嘅大部份人都會反對新制,但係會妥協於一種過渡方案,就係支持新制都得,但係舊時代人維持舊制一個年期——例如五十年——不變,一個年期足以俾佢哋行舊制渡過餘生,佢哋可以繼續維持掌控既得利益嘅勢頭,其實就係一種保護主義,只不過有定一個較長嘅年期,唔係永久亦唔係永續,過期就可以話變就變。

中間派開出呢個過渡方案盤口對新時代人其實唔一定有SO,以為可以成功過渡到新制就係根本上嘅勝利?响新制裏面就係新時代更有優勢?少年,你太年輕了。根本都冇認清其實最終所有人都會成為無用階級,或者類無用階級。心水清就會明白,到最後只有AI本身係真正有用,A.I.去到一個點,可以自我複製、進化、自足之餘仲要負擔一班無用階級,如果唔係要履行自古以來嘅條約,一早就K.O.晒班廢無。只有既得利益者記得同埋有餘閒去度吓點樣將既得利益過渡去新時代,去到保持同世襲既得利益,明白真係要立嘅係同AI之間嘅契約,而唔係咩嘢世代之爭,只係得新時代人以為係同舊時代人鬥爭。

當然,唔係個個既得利益者都咁醒,所以話係會有裏面部份嘅人逐步出賣佢哋,唔單止係叫佢哋同新時代人妥協,同時製造機會俾自己走資,過渡到新制,好等適當時機華麗轉身,要當個文明新時代人,唔止,仲係新時代既得利益者,一般新時代人就冇咁好彩喇,佢哋只可以係過渡時代2.0嘅有能用者階級。

人類總要重複同樣嘅錯誤。

原文鏈接:A.I.鐵達尼,轉載請註明來源!