首頁 » 文化 » DSE失手係美滿人生嘅開端

DSE失手係美滿人生嘅開端

 

About Taku Ryū (擇言)

粵典創辦人,致力推動粵文書寫.超內向毒男.現實世界唔識講嘢,所以平時冇機會講嘅嘢會寫晒上Facebook.語言白痴.哲學仔本尊.愛就係選擇.應用哲學推廣員.我先唔想認係傲嬌黨黨員

又係DSE放榜嘅大日子。

過半考生可能都一心諗住入大學,入唔到就重考到入到為止。不過我要提提大家其實入大學唔使急。如果你成績唔好,直入大學固然係好;如果考得唔理想,爭到離行離列嘅,或者你未有明確目標,又或者你未學識點分配時間,又或者你嘅語文能力尚待改進——總之繼續讀落去未必解決到問題。呢個時候不妨考慮儲一儲經驗值,學啲新技能。

考試衰咗,噉做咩好?

旅行散心,係最差嘅選擇。旅行係消費、燒銀紙,唔會學到啲乜。呢啲留返退休先做都未遲。而家行萬里路已經冇咗當年嘅意思:要國際視野,去重慶大廈,要睇名勝風景,上 Google Map。

你而家應該做嘅,一定係結婚生仔!

湊一個細路要用好多精力,後生仔最多嘅就係精力。唔通等四十歲先至生?俗語話「有仔趁嫩生」,真係智慧嚟,唔係呃你㗎。

早生仔當然仲有好多好處,其中一樣就係減低外界對你嘅誘惑。至少你唔會掛住溝仔、溝女,亦都唔方便日日同朋友去wet去蒲,因為自己(或者老婆)大咗肚,進入咗人生另一個階段,睇嘢嘅層次都唔同咗,開始會專注人生其他更重要嘅事。

另外,為咗養家你定要搵工。返工係用生命換錢,係消耗人生。但係冇消耗過係唔會明白時間幾咁寶貴。返工遇到嘅挫折,或者會令你更加嚮往學習,令你有更大動力進修都未定。

再講,喺你湊仔嘅過程,你識到一大班心智成熟嘅家長,同佢哋相處,點都會學到嘢。

到你嘅仔女入咗小學,你再諗讀大學都未遲。呢個時候你修心養性咗一排,儲埋唔少錢,有工作經驗,有專注力,甚至有人脈,心智再成熟咗,返去大學用人生贏家嘅身份讀書,諗下都爽啦。

所以記住,攞咗成績表,唔使灰心。今日你得一個目標,就係結婚、生仔。

[1] 有人問:邊度有錢?咁後生結婚,梗係一切從簡啦。到咗三十歲就要使幾十萬擺酒㗎喇。

 

作者︰擇言

原文︰https://goo.gl/PZzjJz

原文鏈接:DSE失手係美滿人生嘅開端,轉載請註明來源!