首頁 » 文化 » 【傑出衝出嚟柒系列】未起機就射

【傑出衝出嚟柒系列】未起機就射

 

話說從前有窮撚同女朋友坐經濟艙,仲要係夜機,坐窗邊嗰排,咁三個位一排啦,見都就起機喇,隔離最出個位都仲未有人,以為個位吉啦,班機唔full,其實都好多吉位,點知最後有個阿太姍姍來遲,放完手提行李,又要搵機艙服務員雪佢揸住嗰盒cake,空姐服務好好,幫佢搵咗啲冰嚟,將盒cake用膠袋裝好,再放入放咗冰嘅袋,真係好周到,因航就係唔同啲,爛船都有三分釘。

但係同其他航空公司一樣,都係無可避免係要delay起機嘅,可能係因為機場個新航空交通管理系統真係有咁大影響力,因航喎,都要遲起機,咁呢段期間由於仲可以上網,三條友仔就各自各精彩咁掃手機啦,直至架機開始行,手機要轉去放飛機mode,女朋友就攞本濕平咩加仙嚟睇,睇睇吓啲燈dim咗,唔夠光睇唔清楚啲字架嘛,咁就開個位盞閱讀燈啦,一開,嘩,燦眼到爆,盞燈竟然係射住窮撚個頭而唔係正常照返埋便開燈個閱讀位,咁梗係要擰返佢照過去啦,一顎高個頭燦到正,好似正午抬頭望太陽咁,舉起隻右手,擋一擋個太陽,隻手一直伸上去,手掌正好遮住晒成個太陽,但係一揸落去盞燈度,手指罅就會射啲光出嚟,黑嘛嘛睇唔到靠隻手去摸叫摸黑,咁光燦燦睇唔到靠隻手去摸就應該叫摸光喇,擰擰吓總算擰歪咗少少,而家變咗係照住窮撚個膊頭位,但係想再擰過啲就擰唔郁,再用力啲個燈罩仲甩埋,其實佢只係扱落去,好易甩,又好易就扱返落去,見就起機,好似已經行到出跑道,倒不如起完機先搞,女朋友就住嚟睇,隊本咩加仙過窮撚膊頭度睇,見佢睇得咁辛苦,窮撚真係唔忍心,又再嘗試擰盞燈,就喺呢個時候…

「燈嘅角度係冇得較架」兩人轉個頭過去,見到一副化恆妝嘅妝容,佢recap「燈嘅角度係冇得較架」一個自信爆棚嘅神色,阿太滿以為自己係恥笑緊個傻仔,大鄉里,亂咁搞搞埋爛人啲嘢啦,當時嚟得太突然,唔知點解窮撚竟然回咗一句,「頭先擰咗吓係郁到架,跟住太實郁唔到咋嘛」,窮撚講完都覺得自己戇鳩,竟然應佢,明明盞燈擰得係常識,但係有人理直氣壯咁講一啲另類常識,就真係當堂打個凸,一時都唔能夠正常咁接到落去,用另一個角度去睇,其實係幾型嘅,好似啲殺人事件簿漫畫咁,啲人騷動之中忽然暗處傳出一句,成班人擰頭望過去,跟住佢recap多次嗰句再繼續講埋落去,但係今次只可以型到嚟呢度。

跟住窮撚決定一定要即時搞掂盞燈,就算而家呢刻就起機,都照搞,但係盞燈真係好實,反覆嘗試都係轉唔到過去,唯有坐直晒個人,舉起雙手,用兩隻手嘅力,終於一嘢就擰郁咗,擰多兩擰,對返正個角度,可以俾女朋友睇書喇,阿太呢個時候做緊乜?佢故作自然附庸風雅咁喺度轉腳腕,鬆筋,係兩隻一齊轉,若無其事,冇再擰個頭過嚟,好撚嘢,真係想唱返句「朋友你太戇鳩,怕我講出口覆水難收」。

後來空姐俾咗份問卷呢位阿太,餐後佢開始填,因為夜機,餐後熄燈,忽然間,一燦,好似中咗太陽拳,佢老味原來阿太開閱讀燈,一開又係射正窮撚個頭,唔知上一手定上上幾多手玩乜嘢,幾盞燈竟然都係射住中間個位個頭,好似審犯咁,今次又要勞煩窮撚擰燈喇,等窮撚又再一次有機會示範點樣較盞燈嘅角度俾阿太睇,等阿太可以繼續完成埋佢份問卷。

最後補充,呢位阿太如果戴返副眼鏡,真係十足十林鄭。

 

孤蘭朵 Facebook

原文鏈接:【傑出衝出嚟柒系列】未起機就射,轉載請註明來源!