首頁 » 文化 » 點解咩嘢嚟到香港都會變晒質?

點解咩嘢嚟到香港都會變晒質?

 

圖為雞扒,只供參考

點解咩嘢嚟到香港都會變晒質?話說有一日喺吉野家食「洋食朝食」早餐,吉列魚柳係凍嘅,唔止面頭,凍到個心中間都係凍嘅,應該都擺咗好耐吓。但係買飛嗰陣呀姐話要等四分鐘喎,因為係即炸。出嚟個結果咁大對比,呢個衝擊都唔係話細嘅。

吉野家來自日本,我哋好多時都會好傾慕日本人現代嘅文化、文明特質,鍾意佢哋啲產品、食品嘅品質,因為有保證。呢種保證唔需要講出嚟或寫出嚟,你去到日本是但入一間鋪頭食,食拉麪好、食西餐又好,都唔會難食,質素只有好食、好好食、同「嘩~好美味呀」嘅分別。雖然近年開始受到外來文化衝擊而有變質嘅危機,唔難發現喺鋪頭當眼處出現「國產米」保證嘅字眼,但係呢啲行為都係佢哋堅守原有文化、本身品格嘅行動,因為佢哋都珍惜久經歲月沉澱落嚟嘅文化精髓,而效果都可以見到係唔錯嘅。

去到日本少不免會搭電鐵,日本城市地區嘅電鐵一般都係好寧靜。唔係話電鐵冇機器發出嘅噪音,而係列車上、月台上甚少聽到有人喧嘩。就算近年有出現,都係聽到外語而唔係日語,當中又以漢語居多。可能大家都會覺得呢啲就係日本人嘅特質,然而今次呢度想要帶出嘅唔係呢個「偉論」。

話說早前去泰國曼谷,幾日之間响鐵道列車上,幾次遇到有貌似定居曼谷嘅日本人就响正側邊,佢哋分別有兩位青年、中年夫婦、兩位大叔、以及一家五口兩女一仔其中兩個好細。不約而同佢哋都係會平常咁傾偈,唔會好似身處日本時噉樣唔多講嘢,就算講都靜雞雞好細聲噉同側邊講,仲要附帶尷尬嘅表情,表示唔好意思打擾到其他人。

同為日本人,點解身處日本同定居海外就會有咁大分別嘅呢?講到底,文化就係要有載體,如果冇載體,文化只係形同教條。一條、兩條、三條,每一條說明一個文化裡面嘅一個特性,疊加起嚟而勾畫出輪廓。然而呢個輪廓只係一幅畫像,冇生命,冇靈魂,就好似擬人嘅機械人,無論我哋點樣設定佢,佢都唔係一個人。

文字記載係好重要,同文化載體同樣重要。有好幾部外國著作都有描述日本文化特質,例如《菊與刀》、《曖昧的日本人》,文化係會跟隨時代改變,文字記錄响文化保質上起到重要嘅作用。文以載道,承上所言,文字幫助勾畫出文化輪廓,而呢個輪廓係根據當時嘅實境下筆,保留住一個意像,留俾後世一個參照。舉例孔子儒學有後人錄論語流傳,佛教亦有佛教三寶「佛、法、僧」核心,用佛法作規範,僧人作載體,令佛學得以推廣,普渡眾生。

日本人作為日本文化載體,保留日本原有文化於日本本土,進而推廣去世界各地,正如香港唔少人愛好日本文化產物,泰國曼谷亦有唔少日本百貨,都係一種「文化侵略」,但係俾佢侵略嘅人竟然甘之如飴。而呢種所謂侵略又唔見得會取代咗當地既有文化,充其量都只係為一地文化帶來新元素、帶來衝擊,咁樣嘅改變實屬文化交流。返去之前個問題,同為日本人,點解身處日本同定居海外就會有咁大分別嘅呢?其實好簡單,入鄉隨俗。如果一個日本人只係短暫滯在一個城市,佢就算入鄉隨俗,最多都只係禮貌上跟隨一啲表面上嘅禮儀行為,未足以改變一個日本人嘅文化習性。但係要長期定居於一個城市,必然要學習當地文化,改變自己習慣去適應當地生活,最終達至同化。而同化係邊個吸納咗邊個?當然係主要而人數眾多嘅本地人吸納外來定居嘅新移民。即使係日本文化生產力、國力都喺泰國之上,最多都只係文化交流為泰國城市中嘅文化加入元素,而一般日本人要移居泰國係要承認一樣嘢,就係佢去嘅泰國呢個地方,裡面嘅泰國人就係泰國文化嘅載體,你一個日本人去要人哋地方要以自己嘅文化去同人哋嘅文化同化,噉樣簡直就係杯水車薪,相反泰國本土人數眾多,以泰國文化浸一個日本人,有咩辦法唔係日本人被同化吸納?呢個現象係世界通用,有違呢個法則一定會有反噬。

就好似香港嘅新移民咁,早期新移民多數都會學習香港文化,希望可以做一個真正香港人,而唔係只換咗一個身份嘅大陸人。當時佢地都好明白,離開大陸嚟到香港就係要做一個香港人,唔可以將大陸果套帶落嚟,就算有啲嘢一時改唔到,都知道要改係會改嘅。後來香港主權移交之後,風氣就唔同咗,多數新移民會保留大陸果套,佢地會結黨。「沙士」之後「自由行」之門大開,佢地就聯同可以經常往來嘅大陸人喺香港建立大陸果套制度。香港嘅文化就受到前所未有嘅衝擊,而受到呢種衝擊嘅香港人並冇甘之如飴,因為呢個衝擊帶俾香港嘅新元素唔係日本果種優質,而係一種劣質元素強加於香港文化,對香港文化嚟講係一種傷害。點解香港咁多香港人唔鍾意大陸人,連帶唔鍾意大陸人有嘅性質,包括普通話、簡體字、右上左落、左呔車?就係因為文化反噬。香港作為一個獨立自主擁有過百年歷史嘅國際大都會城市,本身本土嘅香港人就載滿咗香港發展出嚟獨有嘅香港文化,外來人理應融入香港文化。而現況卻係外來人自帶外來文化灌入香港,誓要取代香港文化,係實質嘅文化侵略。

 

孤蘭朵 Facebook

原文鏈接:點解咩嘢嚟到香港都會變晒質?,轉載請註明來源!