首頁 » 政治 » 喪鐘為誰而鳴?喪鐘為TVB而鳴
標籤:,

喪鐘為誰而鳴?喪鐘為TVB而鳴

 

當ATV俾大陸玩到爛哂,唔執唔得,TVB在旁竊笑。當HKTV受一男子影響,攞唔到牌,TVB落井下石。但係TVB都唔會命長,都幾可肯定,如非非命,有生之年一定可以見證TVB步ATV同HKTV後塵。其實香港各行各業都面對緊同一個問題,就係紅資入替,本土退市。

地產︰以目前紅資投地取向去睇,地產業交棒已經行到中盤。呢條路由當初依賴紅資建材,本地中型發展商與紅資合作頂勝本地大發展商取得項目,到紅資在本地自立門戶,一路走來,按步就班,另一方面大孖沙又妥協,只要俾佢抽埋最後一水,慢慢最終達至交棒,絕冇問題。

地產服務︰雖然施永青話Q房網冇威脅,但係做大陸客,一定係大陸公司著數。最初,或者係靠挖角本地代理,到打低本地公司,本地經紀將成為橡皮圖章,由可以在香港自出自入嘅大陸仲介進行實質運作。進一步新移民經紀大可以取代土生土長嘅經紀,或者政府開放埋俾大陸仲介來港執行代理,到時中原美聯邊有得打,只可以退。

建築︰預構件全部由大陸做,運黎香港砌,都已經蠶食咗唔少就業,更重要係會削弱埋品質檢定。

酒樓︰大陸集團入主嘅情況其實同地產同建築差唔多,食品加工都由大陸食品工場做再運來港。

茶餐廳︰地區新開嘅茶餐廳唔少係大陸人或新移民老細。好多舊茶餐廳都係光榮結業,買少見少。

航空︰最後半間本地航空公司都就黎俾大陸買埋,以後香港就冇香港嘅航空公司,只有叫做香港航空嘅航空公司。

所以話,喪鐘為誰而鳴?喪鐘為你而鳴!

另見︰【本土退市 紅資入替】

孤蘭朵 Facebook

原文鏈接:喪鐘為誰而鳴?喪鐘為TVB而鳴,轉載請註明來源!