首頁 » 政治 » 【馬後炮】冇欽點、冇操控、冇鬼

【馬後炮】冇欽點、冇操控、冇鬼

 

大家都係按自己需要去行自己嘅路,每人行一步之後,卻自自然然行出一個特定嘅大趨勢出黎。

中央絕對冇操控,只係宏觀調控。亦冇欽點,因為都冇直接落柯打。冇鬼,只係各懷鬼胎啫。成個結果其實好合理,係順理成章,自然而然。

林鄭係官僚主義嘅代表,當選意味以後可以繼續官商鄉黑。胡官代表公正公義,佢上場就唔可能繼續官商鄉黑,亦唔會俾泛民又好咩都好繼續被迫害。佢根本唔會係任何一方嘅選擇,泛民都唔會揀佢,因為泛民都要永續抗爭,每一日都要係最黑暗嘅一日,先至可以一直玩落去。保皇要擦存在感,只有永續迫害泛民先有存在意義,所以一定要令泛民繼續做受害者,只有greater evil可以依仗,一定要投林。

薯片只可以代表蟻民,泛民本土話佢係建制,建制話佢係民主嘅,所有唔係向權貴傾斜嘅都係會被打成反派。佢當選啲政策就會關顧埋蟻民,自然令商界唔能夠賺到盡。商界根本同蟻民就係對著幹,民利就係商害。商界都趕住最後搵得一年得一年,到紅資全面佔領港土之期,商界就走人,或者北上(如果有幸冇俾人兔死狗烹)。淨返長年被剝削嘅蟻民,「國」庫又已經被掏空,可以一齊坐埋玩手指。保皇唔可以俾薯片上,過去個政府又好各政黨又好,都已經廢晒武功。如果個機關正常運作返,班廢人就冇運行。一定要確保會機關係繼續任人為親,擦鞋至上,可唔可能持續發展唔係佢地要諗嘅野。佢地係最短視嘅人,在位撈油水,過後有肥雞。就連警察犯法都有安家費,只要係做政治任務,就一定會有社會保障。

泛民今次ALL-IN薯片,好似係順民意,又好似係造王,又好似係向建制妥協,然後冇人知佢其實做緊乜。最後原來又係製造一班失敗者,小圈子選舉面前,將無力感放到最大,一定要全力支持一個好似有得贏又一定贏唔到嘅人。以策略之名行無謀之實,似是團結捆綁,實際係排外排他。連薯片自己本身到最後關頭都棄選,叫做睇民意果啲要投薯嘅都已經決定左,未決定投薯嘅都唔睇民意,薯片要同林鄭爭啲咩野佢出得黎選佢自己最清楚,而以上述各懷鬼胎嘅角度去睇,爭唔爭得贏佢自己亦最清楚。所以到最後黎玩民意造勢大會,以定局勢,不失為一個好結尾。咁樣退落黎都叫退得好好睇睇。

有咁嘅局咁嘅勢,中央其實唔使點做啲乜,自自然然就會有想要嘅結果。

原文鏈接:【馬後炮】冇欽點、冇操控、冇鬼,轉載請註明來源!