首頁 » 心情與故事 » 「計算人,計到盡!」自九十年代「專家話」說起

「計算人,計到盡!」自九十年代「專家話」說起

 

「去旅行,去到盡!」唔係賣廣告,不過真係好很洗腦。實情係「計算人,計到盡!」

大部分人嘅「計算」,只係響小部分人嘅「大計算」之內嘅「小計算」,一切都限制於小部分人嘅「大計算」結果之下,定立嘅種種條件。即係咁,其實幾多人,係因為面對無法改變嘅呢啲條件,所產生嘅無力感,而甘願去作「小計算」,去參與「計算」黎到為自己減少損失呢?講到尾就係自私,而人類自私本質,就係「大計算」有考慮到嘅部分。而當中亦考慮到「小計算」會考慮到其他人嘅自私,繼而會選擇作出自私短視嘅「計算」。

一切要自九十年代「專家話」說起。原本啲人係好拜(or buy)「專業意見」,只要啲人一聽到啲專家講過,就會周圍同人講「專家話」乜乜乜。有見及此,背後開始有人利用專家把口放風,講啲「專業意見」,去影響大趨勢。啲人又繼續信到十足十,繼續透過「專家話」以訛傳訛。但係專家有限,商機無限。開始有人包裝一啲「專家」出黎,即係所謂「冇料扮四條」果隻。漸漸啲「專業意見」都唔係幾「專業」,就連一般人憑常識(有賴從前啲「專家話」)都可以判斷到係「鳩噏當秘笈」。自此,所有人都質疑專家。

到「後專家話」時代,大家開始相信「民間智慧」,認為「高手在民間」。更有唔少人認為「專業」唔算得啲咩,自己都可以啦。我唔質疑有高手淡薄而藏於民間,但係民間過分高追「高手在民間」,其實又係另一種膜拜。只係膜拜對象改變,行為依舊,更加弊嘅係對象嘅劣質化同局限化。唔去學習理解唔明嘅野,只係不斷停留響同溫層。因為相信「專業意見」都係陰謀,所以只可以信「民間智慧」,結果令到社會階層斷裂。搞陰謀繼續搞陰謀,「民間智慧」繼續響同溫層有限度地「計到盡」。

「計到盡」精要之處在於真係計到好盡。就好似「懶人包」咁,唔知幾時開始網絡上興起左「懶人包」呢一樣仆街野。咪住先,咩野係「懶人包」呀?「懶人包」意思就係本來一件事係好詳細,好多好多資料,要睇哂然後消化左,先至真正知道事情嘅來龍去脈,但係「懶人包」就將呢一切簡短精要咁寫出黎,睇左「懶人包」就如同了解哂成件事。

本身「懶人包」係來自有時我地要做一樣野,或者要設置好一部電腦,當中涉及一連串好繁雜嘅步驟,成個過程要做好耐,中間唔可以做錯或都做漏,唔係就由頭做過,咁有啲死士就去做左,浪浪費左唔少做錯野而由頭做過嘅時間,仲要記錄低邊啲地方容易出錯,邊樣野一定要做左先,之如此類,之後其他人只要跟住呢個記錄低嘅步驟去做,就諗都唔洗諗照做就搞得掂架喇,呢個記錄低嘅步驟就叫做「懶人包」喇。後來仲有更懶嘅「懶人包」,就將好多步驟都寫成程式,即係果啲所謂一鍵安裝嘅「懶人包」,就係咁,唔知幾多電腦執行完呢啲唔知可唔可靠嘅「懶人包」中左毒都未知。講返「計到盡」,用「懶人包」嘅人正正就係計過,用「懶人包」可以慳返好多時間,「零成本」齋賺,所以夠料做野都唔做住,等「懶人包」出左先。

「計到盡」嘅人已經係不問過程只尋結果,佢地唔需要可能性。佢地唔需要其他答案,只要一個標準答案。點先可以達至「計到盡」呢?盡又即係最,要「計到盡」自然就係要得到最好嘅答案,唔係你計咁多黎做咩?但係點先係最好?最好並冇任何標準,最好係浮動嘅,每一刻都變,即係其實每一刻都要計住。大家都係咁計,係咁計,不停咁計,計下計下又發覺,原來有好多同其他人相通嘅地方。搞搞下變左喺同溫層裡面,你計下我,我計下你,研究一下人地點計,呢啲就係「民間智慧」,相比之下,自己到低有冇計蝕,搞到最後變左「計本位」。

如果要講真係可以有排講,CP值都未講,留返有日得閒再講。

孤蘭朵 Facebook

原文鏈接:「計算人,計到盡!」自九十年代「專家話」說起,轉載請註明來源!