首頁 » 心情與故事 » 今天我們不談一國兩制只談一生一世

今天我們不談一國兩制只談一生一世

 

就趁今日呢個大好日子黎一個批鬥大會。話說有一家人,佢地成家都唔食煙嘅。每逢過時過節個老豆啲細佬妹總要上黎佢地屋企同佢食餐飯,唔黎唔得嘅,因為細佬妹係應該要去大佬屋企做節,呢啲優良傳統係一定要好好傳承嘅。咁好正路呀,有咩問題?問題就在於呢家人係全家都唔食煙嘅。好喇,咁老豆啲細佬妹黎到坐低就點支煙食吓啦,但係呢家人係唔食煙嘅,所以就冇煙灰盎,唔拿拿聲搵野黎乘住就一地都係,唯有用碗啦,碗原來唔係咁啱用,咁就用碟,就係咁,成屋都烏煙瘴氣,唔食煙嘅一家人就要係咁忍受呢啲二手煙,最慘佢地過客走左留低嘅係成屋傢俬嘅三手煙,久而不聞其臭,但係就後患無窮,影響深遠。大人一把年紀可能都果頭近,覺得冇乜所謂,咁啲細路呢?

過時過節成班親戚圍埋就實係賭錢。打麻雀,鋤Dee,呢啲就等閒事啦。呢啲都係去得太慢喇,唔夠快,唔刺激。上落要快,有十三張,有牌九。一家人圍埋係咁賭係咁賭,錢就總有人贏有人輸,明明係一家人,但係一講到錢就你想我死我想你死。有時親戚食飯又會帶埋朋友黎,又會玩返兩手,但係唔知點解啲朋友個個黎親都係高手,次次都係贏錢走,跟住親戚上頭都係咁話,個個你怨我我怨你,怨咩?怨點解輸錢俾外人,真係好笑。大人就係咁玩法,細路就係咁睇係咁學,原來呢個世界係咁樣樣嘅。學壞三日學好三年,細路仔學野好快,尤其係啲衰野。

今天我們不談一國兩制只談一生一世。親戚,就係一生一世,血緣,就係一生一世,今天我們不談一國兩制。

孤蘭朵 Facebook

原文鏈接:今天我們不談一國兩制只談一生一世,轉載請註明來源!