首頁 » 生活 » 出街食飯要有勇氣

出街食飯要有勇氣

 

天堂還是地獄

香港被譽為美食天堂,但係作為香港人嘅我每逢同朋友出街食飯,又或者屋企人出街食飯都唔知道食咩嘢好。又或者約好係個地方等,之後去到再諗,點知就會變成「食咩啊?」「你諗啦。」「咁你又話尖沙咀。」「咁旺角冇嘢食呀嘛。」等等等等。點解明明好多食肆都可以話冇嘢食?又或者因為試過太多餐廳之後唔會再返轉頭,然後連本身經常去開餐嘅地方品質都已經再唔會有保證,出街每食一餐飯都好似要有相當嘅覺悟,又或者只能希望唔會再中伏。你中過伏嘅餐廳你永遠都會記住,記得千祈唔好去,然後每一次經過都會記返起佢有幾咁難食之餘仲要鬼死咁貴。仲會阻止身邊嘅人幫襯。點解一間餐廳去三次叫埋同一款野,三次嘅味道都唔一樣?第一次去完覺得好食會再返轉頭,第二次去未到已經唔同咗,第三次諗住再俾多次機會嘅時候發覺自己實在好天真好傻。

在你們看不到的背後

飲食業不嬲都流失高,每一年過年後流失率最高。而不嬲流失率已經高嘅廚房變得更加高,所以咁樣都可以解釋到點解每一次啲食物都唔同味。係香港做廚師,無論係中廚又好西廚又好飽餅師都好都係工時長,人工低,工作環境差兼且係不受重視嘅職業。 試問係咁嘅地方工作又點會用心去做好佢,食物又點會好食。久而久之廚師就會離開,到新嘅環境工作但係同一個問題仍然存在,然後「離開」不斷係業界內循環。餐廳來食物嘅質素自然就會好似啲股票咁上上落落,然後有一日就會消失。

曾付出幾多心跳

既然待遇差點解仲會有人做? 老一輩嘅廚師大多數都因為返唔到轉頭,除咗係廚房之外咩都已經唔識得做。後生的話,因為仲有對做廚師嘅興趣同熱誠所以唔介意付出自己嘅勞力,汗水同青春係呢一個毫不起眼嘅職業上,原來到最後都係得不到尊重得不到重視。當你以為後生一輩不及老一輩「好捱得」係一班廢青嘅時候。其實大多數做廚房嘅後生仔女,有邊個唔係做12,13個鐘一日,有邊個又唔係「好捱得」? 係啲咁嘅環境之下捱左幾年,見唔到出路,睇清楚呢一行好自然就會離開然後再唔會返轉頭,當初嘅熱誠已經消失得無影無蹤。技術不得傳承下去,有新血但不停流走嘅行業又點會做得出色。

原文鏈接:出街食飯要有勇氣,轉載請註明來源!