首頁 » 科技 » YotaPhone 2 震撼清貨真係咁荀?睇過至知

YotaPhone 2 震撼清貨真係咁荀?睇過至知

 

 

近日「衣鬆」力 Sell YotaPhone 2 話震撼清貨,售價低見千元以下,係咪真係咁荀先?

YotaPhone 2 有幾好?佢除左係普京電話同習總電話,仲係搭載左 EPD 電子紙觸控屏幕嘅雙芒手機,買來當輕便版 Kindle 睇書都得,只要安裝 Kindle app 再選擇用 EPD 電子紙就得,效果同 Kindle 書一樣。

全新 Yota Phone 2 目前只售 HK$950,想當初登陸香港時索價 HK$5,999,照咁睇真係平左好多喎。

一般人會認為一部手機減到咁平,梗係就黎出新 model,快快散貨驚新 model 一出舊機就冇人買。但係買之前,有冇睇清楚自己買緊乜呢?

有冇留意到個型號,寫住 YD206 呀,咩係 YD206 呢? YotaPhone 2 有分唔同型號,呢個 YD206 係中國版,有別香港賣開嘅國際版,國際版係 YD201 呀,有咩分別?分別就大喇,唔係講咩都大陸就唔好,但係因為大陸你都知啦,限制多多,制式又唔同,佢個 LTE 係少好多 Band 即係 4G 會好多地方收唔到或者收得差,咁如果用 3G 又好似冇咩所謂,係咪係都要分得那麼細搵黎講?唔止架,中國版個 Android OS 只可以去到 4.4.4 而國際版可以去到 5.0 而且新版 firmware 修正左好多小問題同埋對電子紙屏幕有更好支持,如果唔知真係買左仲以為真係同以前賣 HK$5,999 部一樣。除左睇型號 YD206 之外,仲有一個認證方法,就係睇 IMEI 最頭 8 個位數字,35969406 即為 YD206 而 35643106 就係 YD201 , IMEI係每部電話獨一無二嘅號碼。

咁其實呢個銷售手法有冇問題呢?將從前賣 HK$5,999 部嘅 YD201 用黎同而家賣緊嘅 YD206 作比較,而又冇指出當中嘅差異,只以平價作招徠,如果對產品冇詳細研究細心觀察,係唔會知有差別,買左次一等嘅貨都唔知道。當然,佢咁賣係明碼實價,佢又真係賣緊 YotaPhone 2 喎,冇呃人架。

之不過香港人呢就唔理得咁多,但求就手易入口,又不用分那麼細,就好似行政長官選舉,參選人政綱寫到明係推 831 係推 23 條,一樣咁支持。206 充 201 黎賣,邊個知?知又點?香港都就黎轉制式,買定 206 跟中國制吧啦。

原文鏈接:YotaPhone 2 震撼清貨真係咁荀?睇過至知,轉載請註明來源!