首頁 » 政治 » 【幾打得】繳械

【幾打得】繳械

 

講返上年十二月泊車仔被挾梯間狂毆致命,其實啲人明唔明咩叫繳械,就係令你冇得反抗,冇得議價,任人魚肉,咁樣跟人入樓梯俾人叉頸,還以為人家會同你客氣,羞辱吓就算,乖乖地聽聽話話的下場,就係命都冇。從前一位老師在課堂上問學生,如果在街上有人話,一係俾我打一拳,一係俾我捅一刀,咁點,學生普遍選擇被打一拳,問點解,因為捅一刀會死,打一拳就比較少損失,最後老師問點解要揀,明明兩樣都唔合理,應該兩樣都唔揀,其實在有得議價的情況下誰會願意揀,關鍵還是如何避免自己落入冇得揀的境地。

自毀長城

回看特區行政長官選舉,兩害取其輕,好多人都話要先選個 Lesser Evil,唔好俾梁振英 2.0 加大禍港傷害,等香港休養生息,第時再圖大計,出現好多未選先投嘅情況。如果我地假設梁振英五年係香港一場敗仗,戰勝一方通常會向戰敗一方提出不合理要求,最理想就係要求對方放棄防禦設施,失去自衛能力,然後先再慢慢閹割。但現時香港未淪落至此,因為香港還有健全嘅司法制度,雖然在釋法風波之下已經裂痕滿佈。成也基本法,敗也基本法,香港暫時還有基本法呢個金鐘罩護身,有廿二條又有五十年不變,然而已經有人嘗試挑戰話只係資本主義制度五十年不變,五十年實屬上限,下限可以係明天,因為應該唔係今天,當然轉頭釋法又可以話追溯返去一九九七。透過今次選舉中共會嘗試向香港收割乜野呢?廿三條立法?政改收窄選舉權?大白象使錢?財政儲備流出?領土使用或執法權?開放或加入中央在港特權? Lesser Evil 真係講緊人?邊個當選係關鍵?就當曾俊華真係一定當選,點樣就上述各項防止中共收割?總唔會係由得佢出個政綱,跟住大家唔駛諗咁多照投佢一票,有錢出錢有票出票,總之唔係林鄭葉劉就得掛?相反,如果著眼點在於如何掣肘當選人,防止其當選後「現形」做出傷害香港嘅行為,選邊個就變得較易落手。Lesser Evil 就係撇除政治任務考慮之後,施政對社會可更有作為者,因為政治任務還要待其出招之時見招拆招。

 

孤蘭朵 Facebook

原文鏈接:【幾打得】繳械,轉載請註明來源!